Tou Khiam-sùn (杜謙遜 牧師)
真歡喜知 iáⁿ 台語羅馬字漸漸得著重新接納 kap 重視，這是社會進步 ê 好代誌。
當然，咱愛 koh 努力 ê 路 iáu 真長， chóng-sī 有起步就有前途。
最近 tú-hó 整理好「前台灣共和國臨時政府大統領」廖文毅博士 ê 家族史，然後就 tú-tio̍h 西螺鎮公所通知廖家愛 khioh 骨遷葬廖家先人收回墓地 ê 代誌。 Sîn-tio̍h 這項 khang-khòe 應該背後有上帝好 ê 意思，若無 ná-ē chiah tú-hó 。 這項代誌也 ǹg-bāng 咱台語文界的先進 ta̍k-ke 來 tàu-saⁿ-kāng ，出聲贊援，也請將 chit ê 新聞消息繼續傳送出去。
廖文毅 ê 祖厝 tī-leh 西螺，用三冬 ê 時間禮聘鹿港師傅起造 ê ，大約 tī 1925 年 (大正 14 年) 完成。真可惜，這間 hō͘ 人叫做是西螺 ê 「小總統府」真 súi ê 西洋式樓仔厝， tī 廖文毅死了後也 kòng 掉，成做地方 ê 遺憾！當時這間 súi 厝的二樓正面有用 âng-mn̂g-thô͘ 黏出 LIĀU SÊNG-PHI ，用 i ê 厝主「廖承丕」白話字 (台語羅馬字) 做厝 ê 名堂。
廖承丕就是廖文毅 ê 老父。廖承丕 (1871-1939) 當時是台南州數一數二 ê 大地主， 1916 年擔任西螺區長，也是西螺長老教會 ê 長老，伊只 bat 漢字 kap 羅馬字。當時廖文毅將祖厝號名「大承堂」，廖承丕用家己 ê 台語名做堂號，確實是 kap lâng chin bô-kâng 。到今仔日，你若來西螺 chhit-thô ，延平老家 ê 古厝，注意看 iáu chhōe ē 出一、二間厝 ê 厝名是用台語羅馬字寫 ê ， che kap 廖文毅 ê 老父應該有絕對關係。廖文毅 ê 老母陳明鏡 (1875-1966) ，伊是台灣第一間女子學校，就是 chit-má ê 台南市長榮女中第一屆的畢業生。上早，長榮女學 ê 課本攏是用白話字 (台語羅馬字) 寫 ê 。聽講陳明鏡 tī 90 歲 ê 時， bat 受長女邀請 tńg 去參加校慶，閣受邀請讀白話字聖經 hō͘ 全校 ê 師生聽。
另外， tī 延平路西螺文昌國小對面 ê 西螺基督長老教會，土地是廖文毅 ê 老父奉獻 ê 。教堂 kap 牧師館是廖文毅細漢小弟廖溫進設計 kap 獻建 ê 。禮拜堂 tī 1951 年完成，建築風格屬 tī 西螺延平老街後期 ê 建築物，正面簡單 koh súi 。禮拜堂 ê 頭前後壁也是用 âng-mn̂g-thô͘ liap 台語羅馬字 KI-TOK KÀU-HŌE ，標明 chit 棟禮拜堂就是「基督教會」。若來西螺會 tàng 歡迎入來教會 kiâⁿ-kiâⁿ khòaⁿ-khòaⁿ leh 。
西螺 kap 廖文毅家族有關係 ê 物件，只有 chhun 命運未卜的「大承墓園」，以及有 teh 修建 ê 西螺教堂。咱若無夠努力，大概後擺來西螺，只有 chhun 西螺教堂，廖文毅家族有百外冬久有歷史 kap 文化保存價值 ê 「大承墓園」也無 tè 看了！
Chit ê 代誌真緊急，到 9 月 12 日若無定案，就真 pháiⁿ 閣有甚麼作為！！
2003/6/19
