瓦解金字塔

咱攏知影,台灣 e 問題真濟,啊這 veh 按怎?

長久以來,咱攏 deh 等社會會來改變,咱嘛一直 deh 等人會通來改變這 leh 社會;結果一冬候過一冬,頂代看過這代 …… ,社會續愈變愈害。

咱定定嘛 deh 講:台灣強 veh 變做 m 是人住 e 所在。是按怎哪會啊呢?原來,咱一直攏無去注意著咱家己 e 存在,未記得家己就是社會。

這是一 leh 「金字搭」架構 e 社會,咱 jia-e 徛 di 下腳層 e 一般人,會通講是過得非常托磨 e 日子,差不多所有 e 勞動行業 gap 小生理攏仝款。「金字塔」頂 e 少數人,掌握著統治 gap 生產控制權力,享受奢華無度 e 生活。

台灣人有一句話:「咱著愛守本份」。無 m 對,台灣人是真守家己 e 本份,但不過大部份人攏是守著「真辜不將」 e 本份,因為若無拖命拼錢就無飯 ho 食。提計程車生理來講,一工起碼愛紡夠 10 至 12 點鐘以上 jiah 會凍過生活,厝稅錢、會仔錢、囝仔 e 讀冊錢 …… 。逐日出門就 dileh 鐵殼箱仔內底鬱歸工,轉來直接 piann-leh 眠床頂,睏 e 時間袂 du 好,某囝嘛無法度相照問; jun 做有時間,嘛攏 deh 看著中國關點 e 電視 (包括歌仔戲、布袋戲) 。

咱所過 e 甘是人 e 生活?做父母 e  ganna 頭殼犁犁一直拼,做囝兒 e 嘛 m 知父母是 deh 無閒啥物。咱辛苦所 chiann 大漢 e 心肝仔攏 ho 咱送去讀中國冊,續 gap 咱講無仝款 e 話,有夠悲哀 …… 。

咱去 ho 小數人逼 ka 若 gan-lok ,無法度用心經營家庭、無社交、 ve 曉買冊來看、無愛關心社會 gap 身軀邊 e 人。 jit 種 e 環境下面,人無機會學習「相款待」,自然 ve 曉相疼 tang ,無容允心。當遇著困難 e 時,嘛 ve 曉用心 chue 出解決問題 e 方法,歹脾氣、自私、無信用、失志、近利、冷淡 …… 充滿歸個社會。也就是按呢,咱用一生青春所 ging 出來 e 社會資源,攏總去 ho 身在金字塔頂層 e 人,安安穩穩 deh 享受。上介慘 e , in ganna 會追求名利 gap 無情 tun 踏咱,根本看 ve 著咱 e 世界。

我定定建議熟識 gap 無熟識 e 朋友,家已來問家已:「我就這樣過一生嗎?」

我鼓勵朋友,強迫家己一個月減做二工。雖然咱會減趁二工,咱 mai 感覺這是損失,咱會通當作是開二工 e 費用去買快樂、成就、親情、健康、安全感、社會地位 …… 。休二工 m 是看電視、跋 giau 、 lim 酒,是出來做「義工」啦。

咱會凍 chue 著一 leh 有興趣 e 團體,親像講社區活動、幼兒教育、關心婦女、環保、文教、殘障、老人院 …… 等等, chua 著某囝鬥陣做「義工」。

有人講是有想著 veh 做啦,阿 m 知 veh 按怎做。簡單嘛,鬥扛、鬥搬、駛車、拚掃、看前看後 …… 攏嘛會使;大人做大人 e 社交,囡仔 chue 著囡仔伴。我一直認為「錢」 m 是唯一 e 社會資源,其實「交朋友」即是趁 ve 了 e 社會資源。好額人用錢請律師、保鏢,求安全,阿咱 veh 按怎?如果咱若長期去 gat 濟濟朋友鬥相工,人攏知影咱「雞婆性」;適使咱遇著困難,甘講咱會落到「叫天天 ve 應」 e 地步?

阿 veh 去 dorh 位 chue 義工 kangkue ?真濟啦,咱定定嘛聽著人 deh 辦活動,先去做人客嘛,只驚咱 m 肯踏出咱 e 腳步,免煩惱無 sit 頭通做。

「繁事按咱家己來做起」,好代歹代攏有感染力, m 通看輕咱對社會 e 感染力。起頭一定有人會笑咱戇,三年五年了後,啥麼人 jiah 是憨人 ia 閣 m 知啦。義工 kangkue 若像去銀行寄金,做愈久、愈認真,咱 e 社會地位真自然著 e 浮愈 guan 。徛 di 金字塔下腳層 e 咱,若是社會地位愈舉 guan ,塔頂 hiah-e bunsor 將歸尾就會溶溶去,因為 in 本來著 m 是咱這 leh 社會 e 份子嘛。

(本文原刊載於「台語世界雜誌」第 8 期  p.25)

Lim Bun-hoa (林文華) 1997/2

--- 延伸閱讀 ---